Cinco familias de outros tantos pacientes oncolóxicos, desprazados para o seu tratamento no CHUAC, beneficiáronse no que vai de ano do piso gratuíto de estancia temporal que ten Asotrame na cidade herculina. O Concello da Coruña apoiará cunha pequena achega económica o programa “Como en casa”, que inclúe ademais o acompañamento psicosocial para as persoas hospedadas.
No marco da súa liña de subvencións para entidades de iniciativa social sen fin de lucro que realizan na cidade proxectos de interese social, o Concello destinará a Asotrame algo máis de 2.600 euros. Unha aportación que permitirá afrontar parte dos gastos precisos para ofertar completamente de balde, ao longo do 2026, o apartamento situado no barrio das Flores (aluguer, electricidades, auga…)
“Como en casa”, que botaba a andar na Coruña hai xa nove anos, permite que pacientes con cancro estean acompañados polos seus familiares, mentres reciben tratamento no CHUAC, evitando aos acompañantes teren que desprazarse a diario dende as súas localidades de orixe ou, no seu caso, pagar un aluguer nun momento de especial vulnerabilidade.
O recurso busca paliar o impacto económico da enfermidade e, ao tempo, atender emocionalmente aos hóspedes. Así, durante a estancia na vivenda reciben apoio psicolóxico e acompañamento ao hora de realizar trámites de tipo social.
Dada a boa acollida do programa, Asotrame estendeu o servizo a Santiago e, dende este ano, tamén a Vigo, cubrindo así os tres centros de referencia en materia de transplantes de medula ósea e terapias avanzadas car-t (CHUAC, Hospital Clínico de Santiago e Hospital Álvaro Cunqueiro).
