Volve a Vigo o proxecto divulgativo de Asotrame “Coidar-me!”. E faino con dúas charlas informativas que porán o foco na alimentación consciente e no autocoidado emocional. A proposta, froito do traballo conxunto de Asotrame e Saúdesport, terán lugar na Raposeira e máis en Oia.
A primeira das charla será o martes 16, a partir das 16:30 horas no Centro municipal da Raposeira, “espazo cedido gratuitamente polo Concello de Vigo coa colaboración da Concellería de Participación Cidadá”. E a iniciativa repetirase o venres 19, a partir das 18 horas, no local da Asociación de veciños San Miguel de Oia.
Laura Bueno, educadora social de Asotrame, e a nutricionista do citado centro de alto rendemento para a saúde, Raquel Lucio, estarán ao fronte das dúas sesións gratuítas, aberta ao conxunto da veciñanza viguesa.
O obxectivo de Coidar-me! non é outro que promover hábitos de alimentación saudables, mellorar a relación coa comida e fomentar o autocoidado emocional como pezas fundamentais para acadar un benestar integral.
Na actividade, que replicará a desenvolvida hai unhas semanas no Casco Vello de Vigo, falarase sobre alimentación consciente. Así, explicaranse os distintos tipos de fame que existen, apuntarse como evitar a “fame emocional”, e abordaranse cuestións como a posibilidade de regular, a través dunha alimentación axeitada, o cortisol, principal hormona do estrés. Finalmente, comentaranse estratexias útiles para a xestión do estrés e da ansiedade.
“Coidar-me!” xorde como unha aposta de Asotrame e de firmas que colaboran coa asociación por promover a saúde comunitaria e mellorar a calidade de vida da veciñanza.
